luns, 20 de xullo de 2015

Hestoria d'un mediu pollu (d'Enric Valor)

[Traducción inédita de Pablo Suárez García dende les Rondalles valencianes d'Enric Valor]


Ello yera una vez una casería onde vivía un matrimoniu vieyu ensin fíos, que dedicábase a la cría d’ave: pites blanques y negres, escomanaos aliquebraos[1], enchipaes llueces… yera lo que davezu se vía al rodiu la caseriína.

La vieyina conocía caún de los animalinos que criaba.

Un día de mayu salió la vieyina a da-yos na era unos puñaos de maíz y una bona pastia de salváu cocío, como solía facer cada día a la mesma hora.

—¡Chur, chur, chur! —foi llamando.

Y vei equí qué la sorprendió: había ellí un mediu pollu, mui vistosu y ruin, que nun s’arimaba al tropiellu que formaben tolos otros.

—¿Qué faes tu que nun comes? —estrañóse la vieya mientres que lu escorría p’hacia’l tropiellu. Pero’l mediu pollu soltó un 'coc, coc' mui razonable y entá se separó más de los sos conxéneres.

—¿Y esti qué pollu ye? —entrugóse a sí mesma la muyer—. ¡Esti animalín nun ye mio! —Yera de verdá: nun lu viera nunca enantes.

Tuvo que-y dar vianda a parte y dempués preguntó nes caseríes de la redolada si se-yos perdiera dalgún pollu a medio facer, nin pitín yá nin pollu tovía, esto ye, lo qu’ellí suelen llamar un mediu pollu. Y naide nun supo da-y razón.

El mediu pollu pasó asina delles selmanes buscándola él solu cuando tenía fame. Una mañana, n’estremu la era púnxose a escargatar nuna pila pequeña de cuchu. Escargatando y xurgando, la so patuca sacó a rellucir un trozu metal. Col picu secudiólu una migayina. Entós vio que se trataba d’un dineru.

¡Quiquiriquí! —cantó alzando la cresta too cuanto podía—
¡Que yo soi un mediu pollu
que pente’l cuchu escarbé
y un dineru ende atopé!

Y ensin más nin más, metió la moneda nel so papín, dixo adiós a la caseriína, y pa la corte se dixo. Tira sienda alantre y venga facer camín pan ca’l rei. De xemes en cuando, soltaba un ruidosu “quiquiriquí” y cantaba’l siguiente cantar:

Voi casame cola fía’l rei,
pues soi yo más ricu qu’él,
que pente’l cuchu escarbé
y un dineru ende atopé.

Nestes, llega a unos llanos tapecíos de viesques y yerbazales y atopa’l ríu, quien, en cuantes que lu ve, pregúnta-y:

—¿Aú vas, mediu pollu?

Voi casame cola fía’l rei,
pues soi yo más ricu qu’él,
que pente’l cuchu escarbé
y un dineru ende atopé —contésta-y cantando’l mediu pollu.

—Eso si yo te dexo pasar —diz el ríu cola so vozona.

—¡Entra pel mio picu! —mandó-y el mediu pollu.

Y ¡zzzuuummm!, entama encloyar agua, venga encloyar d’ello y yá tien tol ríu dientro’l banduyu.

Saltando y blincando continúa’l so camín hasta qu’atopó un mayu que namái facía que pegar mayaes.

—¿Aú vas, mediu pollu?

Él respondió:

Voi casame cola fía’l rei… —y el restu’l cantar.

—Eso si yo te dexo pasar —alvirtiólu’l mayu—, porque viénenme intenciones d’estrapallate d’un golpe.

—¡Entra pel mio picu! —glaya’l mediu pollu. Y allá tienes el mayu, que fai pel aire: ¡zumm!, y desapaez pel picu l’animalín.

Y él venga cantar y venga facer camín, pa la corte. Aportó aína a un mestu ancinéu, y d’una lluriga sal-y la rapiega, y los sos güeyos rellampaguien de tan bona merienda como se-y presentaba.

—¿Aú vas tu per equí? –entrúga-y al tiempu qu’abría la boca pa comelu.

Voi casame cola fía’l rei,
pues soi yo más ricu qu’él… —diz el mediu pollu. Y ella atáyalu:

—Eso será si yo te dexo pasar y nun ye pego un taragañu.

—¡Entra pel mio picu! –glaya él de nuevo. Y la rapiega, ¡zzuumm!, como quien se da un calón, espurre les patuques, y ¡pa dientro’l picu se dixo!

A la fin llegó’l mediu pollu, más allegre qu’un perru con un güesu, a la corte real, y a ca’l rei desiguida. Nada nun se-y conocía de lo muncho que llevaba dientro.

D’una revolada mángase enriba l’enrexáu que tien la gran puerta principal.

¡Quiquiriquí!
Voi casame cola fía’l rei,
pues soi yo más ricu qu’él,
que pente’l cuchu escarbé
y un dineru ende atopé.

El rei, que taba pasiando pelos güertos del palaciu, cerca la puerta, siéntelu y enllénase d’indignación.

—¡Mirái el mediu pollu…! —glaya a la guardia—. Garráilu y trancáilu na corrada de los pollos aliquebraos, y ellos tan grandones y enchipaos mataránlu desiguida…

El probe mediu pollu nun tuvo escapatoria. Un soldáu gárralu por fin, ¡y de cabeza a la corrada! Cuando’l mediu pollu se vio tan solu, y que los enormes aliquebraos diben tiráse-y toos enriba, dixo a la raposa que llevaba dientro:

—¡Sal, rapiega, qu’agora ye la tuya!

Sal la rapiega, y echái ver qué fadría: aquel quiero, l’otru nun quiero, nun biribí túvolos a toos goraos.

Y cuando fartucó de comelos, fraya la rede y escapa. El mediu pollu, al que la rapiega nun fixera nengún dañu, pol respetu que-y tenía, salió pel mesmu furacu.

Y pasiando, pasiando tou gayasperu pelos güertos del rei, volvió llantase enriba l’enrexáu de la puerta principal:

¡Quiquiriquí!
Voi casame cola fía’l rei…

El rei que lu siente otra vez, tou enraxonáu llama a la guardia:

—Garráilu… ¡esti mediu pollu’l demoniu! Que nun se vos vuelva escapar. Tiráilu dientro la tina les fieces.

Ente tolos soldaos fáense con él y empobínenlu a les bodegues d’en ca’l rei y avéntenlu dientro una tinona pergrande: ellí yera preciso que morriera’l probetayu mediu pollu afogáu nes fediondes y aceitoses fieces. Pero él, cuando siente que los soldaos tapen la tina cola cobertoria, diz llueu:

—¡Mayu, sal; agora ye la tuya!

Sal el mayu y, pin-pan, de dos mayaes fraya la enorme tinona y el mediu pollu fux. Les fieces arrámense per toles bodegues reales, que queden feches una llaceria.

D’ellí a cinco minutos, yá cantaba él el cantar que sabemos otra vegada enriba la puerta:

¡Quiquiriquí!
Voi casame…

Y el rei, que vuelve perder la paciencia.

—¡Guardia, a min! ¡Facéi un montón de lleña na plaza, arreyáilu enriba y quemáilu vivu! ¡Corréi, que nun vos escape!

Esta vez tampoco nun pue escapar l’animal.

Y faen bandu que fora tol pueblu a la plaza a ver quemar vivu un mediu pollu que pretendía nin más nin menos que casase cola fía’l rei.

Él, arreyáu yá, diba sintiendo los comentarios de la xente que s’axuntaba al rodiu’l montón de lleña:

—¡Ta-y como al ciegu ver! ¡Por querer ofender al nuesu rei!

—Diz que dicen que dicía qu’andaba diciendo que ye más ricu que’l nuesu monarca.

—¿Cómo diba casase cola fía’l rei un animalucu asina que cuasi nun se-y ven los espolones?

El mediu pollu dexábalos dicir, y nun abría’l picu nin pa facer “¡quiquiriquí!”. Y los criaos acababen d’adamascar[2] el palcu pal rei y la so corte, que yá veníen mudaos dafechu a presenciar la execución.

Cuando’l rei, la reina y la princesa garraron asientu, un soldáu que lleva una antorcha na mano avérase a la lleña y pon-y fueu a la pila. La lleña entama restallar perdayures, crax-crax, mientres el xentíu glaya cola boca abierta:

—¡Ooooooh!

Metanes los bufíos de la foguera, oise la vocina del mediu pollu, qu’ordenaba:

—¡Ríu, fai agora la tuya!

Y el ríu sal pel picu l’animalín y apaga la foguera más aína que canta un gallu y arremete a la escontra’l palcu’l rei, y desiguida hai agua per metanes del cadril de la pierna de tolos presentes y allá marcha’l ríu per toes partes afarando güertes y caminos.

El mediu pollu, tranquilu, desátase nun Xesús me valga y mira la plaza, que quedara medio erma, y solo ve ende al rei, la reina y la guapa princesa, que taben enriba’l palcu como n’arca de Noé.

¡Quiquiriquí!
Voi casame cola fía’l rei… —entama cantar, pero’l monarca nun lu dexa continuar; llámalu y diz-y:

—Mediu pollu, nun hai más remediu; vencístime y pues casate si quies cola mio fía.

A otru día fíxose’l casamientu na ilesia mayor de la ciudá.

Toles campanes tocaben a vuelu y un enorme xentíu arremolinábase delantre’l templu pa ver la salida de los acabante casar.

¡Qué entusiasmu! El mediu pollu, enderechándose tanto como yera quien y dando en cuenta’l brazu un ala a la muyer, avanza con solemnidá y arremangu. Y saludaba a tol mundu, que se maraviaba de qu’una princesa tan guapa y esbelta pudiera casar con un cenciellu mediu pollu, por cantador y bracu que fora.

Yá de nueche, cuando los novios se retiren a la so cámara nuncial, la princesa entama pasa-y la mano pela cabecina afalagándola. D’esmenu, nota que, metanes les plumes, detrás de la cresta, tien un pequeñu granu duru. Arrexístra-ylu y ve con sorpresa que ye una cosa brillante.

Mentanto, el mediu pollu quietín ensin dicir un res.

Y la princesa garra tantiguando lo que resulta ser una cabeza d’aguya y estira, estira… y va saliendo esta de la graciosa cabecina del animal. Y cuando acaba salir dafechu, ¡pumba!, siéntese un tuenu y enllena la estancia una llaparada azulada, y el mediu pollu vuélvese un príncipe perguapu que-y diz con voz emocionao:

—Mio princesa: gracies te doi por desencantame. Soi’l fíu del rei de les Aitanes y soi tamién el to esposu, si ye qu’agora que volví a la mio figura d’home, confirmes el real sí que me disti cuando yera mediu pollu.

La princesa, ta claro, allegróse muncho pol fabulosu cambiu y vivieron munchos años de plena felicidá.



[1] ‘(pollos) coles ales rotes’.
[2] ‘orniar con damascu’.