martes, 18 de agosto de 2015

Cómo se fai una fiesta nacional

[La Voz del Trubia, setiembre 2015]

Nos pueblos d'Asturies siguen perviviendo dalgunes guapes y mui autóctones costumes. ¿Queréis fiesta nacional? Pues nun vos faen falta bilmes ayenes pa facer goxes como esa.

 Grande ye por exemplu'l vezu de sapiar sapos. ¿Que vosotros, de ciudá, nun conocéis tan sana costume asturiana? Nun vos esmolezáis, que yo vos la recuerdo: sapiar sapos ye'l noble arte de mangar un sapu nel estremu d'una tabla con una piedra embaxo (a mou de palanca) y golpiar l'estremu opuestu con otru palu, aventando'l sapu al ríu o a onde sía. Otru vezu mui guapu ye'l de manga-ys a estos mesmos bichos un pitu na boca y facelos fumar. El sapu hincha ya hincha... hasta qu'arrevienta d'un mou mui simpáticu...

Y en fin, ¿quién dulda que con tan almirables encontos nun sía cenciello elevar tan autóctonos vezos a la categoría d'arte...?

Mangái'l sapón (¡¡que sía bien gordu!!) metanes d'un corra grande de castañes, dea'l maestru sapiador una  vuelta'l gatu primero de golpiar col palu na tabla o faiga un xuegu de pies a lo Fred Astaire. Afatáilu con un traxe'l país curiosín cola so montera picona y la so banderina. Tirái voladores, que bonos son en cualquier fiesta. Facéi ruíu con esquiles y campanes... Facéi correr les botelles de sidra... y yá ta entamada la fiesta nacional... Y darréu, por supuesto, nun diba faltar quien escribiera los pertinentes manuales que describieran en detalle l'arte de sapiar sapos, nin tampoco los hestoriadores que fixeran alcordanza de la nómina de grandes sapiadores de la hestoria o los eruditos qu'escribieran grueses enciclopedies sapiegues.

Col envís de facer más  grande la fiesta, podríemos tamién combinar delles artes diferentes: sapiar el sapu repetíes veces a poca altura p'acabar mangándo-y un pitu na boca y fayéndolu arreventar, por exemplu, podría llegar a considerase un espectáculu bien prestosu y de munchu tonu. Que la elegancia, a fin de cuentes, ¿quién dixo que tuviera riñida coles tripes, coles coraes, colos tarazones...?

¿Tovía queréis más? Hai quien cuando tien una camada gatinos y quier desfacese d'ella mételos dientro un sacu zarráu y tíralos vivos al ríu... D'ente estos, hai dellos que-ys peguen una ximielga de cuidáu con una fesoria dientro'l sacu zarráu pa matalos primero d'echalos al ríu, pol aquel de ser más humanos... (demasiao humanos), o, a cencielles, pa que los miaguíos nun afuraquen na so sensible conciencia... ¿Inda más? Pues garrái, qu'hai bien d'ello. ¿Nun sabéis capar llimiagos? Consiste esta guapa costume asturiana, pal que nun lo sepa, en garrar un llimiagu (roxu o prietu, que nun da más), travesalu darréu con un palu, y facer entós qu'un pinín al que se quier  tomar el pelo caltenga pelos estremos del palu, mientres el capador-y garra les manes y-y les calca contra'l llimiagu pa que s'empuerque... ¿Entá más? Otros, como se sabe, faen círculos de fueu alredor de los escorpiones... El resultáu ye escelente, un exemplu manifiestu del calter de llei natural de la escoyeta del mal menor. L'escorpión, nun queriendo quemar,  lláncase l'obleru a él mesmu y dase terrible muerte nel intre... Épico ye tamién cuando se priende fueu a un corcuspín... hai que velu con qué gracia cuerre a carrenderes camín d'una sebe... anque esti divertimentu tien como riesgu la quema'l monte, y que se persone ende l'autoridá en defensa de los derechos non yá del corcuspín, sinón de la viesca... ¡Pero nun marchéis tovía, qu'inda hai más! Otru vezu mui mui guapu ye enzarrar un gatu dientro un círculu de mozos y dir zarrando'l círculu. Trátase, cuando'l  gatu intenta escapar (porque va intentalo, de xuru), de remanga-y una patada y aventalu pel aire cuanto más lloñe meyor... De menor categoría, pola poca gracia y lo cotidiano l'asuntu, son los cibiellazos a los burros, a los perros,... y otros entretenimientos menores, pero non menos autóctonos...


En fin, garrái cualquiera d'estes autóctones y venerables costumes, como dixi, dai-y la parafernalia que la eleva a arte, dai-y escenariu al qu'un auditoriu abondosu pueda concurrir botella en mano, apurri-y fondos públicos, imaxinái pa ella falsos anicios (más vieyos que les carriles), engalanáila d'una mitoloxía afayadiza (dicíi 'llucha', 'valor', 'espíritu', 'patria'), y yá la tenéis... ende ta... ¡una fiesta nacional! Y esta, polo menos, autóctona...