mércores, 16 de marzo de 2016

Ermu d'amigos, bienes ya señor (Jordi de Sant Jordi)



ERMU D'AMIGOS, BIENES YA SEÑOR


Ermu d'amigos, bienes ya señor,
n'estrañu sitiu y n'estraña comarca,
lloñe de tou bien, fartu anoxu y murnia,
mio voluntá y pensamientu cativos,
sometíu m'atopo a un mal poder,
quien por min s'esmoleza nun alcuentro,
y toi guardáu, peslláu, ferráu y presu,
y a mio triste ventura-y lo agradezo.

Vi tiempos nos que nada me prestaba,
agora toi contentu atristayáu,
y los grillos llixeros más m'abulten
que nel pasáu la guapa bordadura.
Fortuna vi amosar el so querer
so min, queriendo a tal puntu treme;
nun m'esmuelga, pues fixi'l mio deber
colos bonos que tán na mio compaña.

Que consuélome siendo prisioneru
pol mio señor, sirviéndo-y cuanto pudi,
d'armes sobráu y por mayor poder,
y non por falta de caballería.
Y consuélome al nun ser a algamar
tener nada ensin pasar trabayos,
mas d'otru llau morrer cuido de murria
viendo'l mundu folgase pol contrariu.

Nada ye acostinar con estos males
al llau del que'l corazu me trespasa
y xebrame me fai de la esperanza:
nun ver nada qu'un poco nos avance
en procurar el nuesu llibramientu,
y más viendo lo que nos pide Sforça,
qu'a les nueses razones nun atiende,
y mio virtú esmorez y la mio fuercia.

Poro, nin sé nin veo un res anguaño
que sía a favoreceme niun migayu,
nun siendo solo Dios, en quien m'encontio
y esfoto, y mio corazu tien consuelu;
y d'otru llau el bon rei lliberal,
qu'acorrióme por so gran xentileza,
quien nos punxo dafechu nesti mal,
y ha sacame, pues toi baxo'l so mandu.

Torna

Rei virtuosu, mio señor natural,
nada nun vos pidimos nós agora
sinón que recordéis que'l sangre real
nunca nun engañó al que foi de so.