xoves, 24 de setembro de 2015

Una lliteratura escaecida

[La Voz del Trubia, ochobre 2015]

Tien l'asturianu una lliteratura bayurosa, con continuidá notable desde Antón de Marirreguera (s. XVII) hasta'l Surdimientu actual. Pero, inxusta y estrañamente, solo unos pocos poetes y prosistes tuvieron el privilexu de trescender al conocimientu popular, munches veces por mor d’una versión musicada de dalguna de les sos composiciones (y bastantes d’estes veces ensin que se sepa bien quién ye l’autor). Ciertu conocimientu tien la xente, por exemplu, de Tiadoro Cuesta, poeta idolatráu na so época, al que debemos la célebre "Cosadiella" que Jerónimo Granda inmortalizó nel so trabayu "Terrentempléte, morrióte un xatu", y qu'a toos vos sonará: «¿Qué cosa cosadiella ye una cosa, / (y non ye cosadiella revesosa) / que s'encueye, s'espurre o s'enduviella / y estadoñu paez, blima o cibiella...?». Otru casu ye, quiciabes, el de Xuan María Acebal, poeta diferente dafechu a Cuesta, autor mui cultu, llamáu por dalgunos el príncipe de los poetes asturianos. Cantó a la “Fonte de Fascura” d'esta manera: «Baxando’l puertu Sueve / d'Antayo so la falda, / y d'Uruyán xuntino / pos una piedra algama, / esquita de la peña / la fonte qu'hai más guapa. / Del llau del saliente, / que ye per onde mana, / y que costudo un pocu / hasta una riega baxa, / traviesa la siendina / que va a so mesma entrada». N'época yá moderna musicaríalu maraviyosamente'l grupu Estolaxe, como podéis ver en Youtube. Nel Surdimientu actual, el poeta con meyor fortuna popular foi, quiciabes, Xuan Bello, col so famosu “Paniceiros”: «Conozo un país onde’l mundu llámase / Zarréu Grandiellu Picu la Mouta Paniceiros // Un mundu que perdéu l’aldu los caminos / Xerusalem llevantao na palma la mano d’un nenu // Un mundu que yera altu luminosu esbeltu / Naciente y fonte y vocación de ríu // Onde los homes callen y el silenciu ye renuncia / Onde escaecimos el ser Onde claudicamos // Un país onde la casa cai cai l’horru la ponte / El molín la ilesia l’home tamién cai // Onde la mirada yera pura cenciella / la xaceda que dexara la nube en cielu // Onde namás nos queda la memoria / corrompida de la infancia La nuesa soledá // L’abandonu de nueso». Y poco más se conoz…

Pero resulta que la nómina de los nuestros poetes y prosistes ye, realmente, munchísimo más llarga, y continuada, como dixi, nel tiempu, a lo llargo de cuatrocientos años… Y bono, con esti puntu de partida, con esta traxectoria centenaria, nun dexa d’ablucar dafechu’l desconocimientu qu’ente la xente común se tien d'esta lliteratura, a lo qu’hubo contribuyir notablemente la falta d’estudiu nos planes reglaos de les escueles, pero tamién otros factores. Cierto ye que nun ye dalgo que nun se dea n'otros munchos llugares. El desconocimientu llega, de fechu, dacuando, a los mesmos dirixentes del mundu de la  cultura. Pero ello ye que, amás, nesta tierra, llega la situación a un puntu estremu. Porque yá nun ye'l fechu de que se desconozan, en xeneral, les grandes figures y monumentos de la propia lliteratura. Equí, arriendes, bona parte de la población, cree a cencielles que, rasu por corriente, nun existe una lliteratura asturiana. En discusiones comunes siéntese espetar dacuando, cuando d’ello se fala, que l'asturianu... ¡nun tien lliteratura! Pero, lo que ye entá más grave, fataes como esta tienen llugar tamién n'entornos que podríemos considerar 'cultos'. Nel mundu filolóxicu peninsular esterior a Asturies, por exemplu, y refiérome al mundu académicu, la lliteratura asturiana ye ciertamente una gran desconocida, y nun falta quien, mesmamente ente profesores d'universidá, s'amesta al grupu de los que la dan por inexistente... o, a lo sumo, aceuten que se resume nunes poques obres costumistes... prescindiendo inclusive de la lliteratura asturiana actual,  que ye, ensin dulda, d'un nivel equiparable  al de cualquier otra lliteratura del mundu, y qu'habría ser oxetu necesariu d'estudiu pa cualquier investigador de la lliteratura peninsular. Y la cuestión ye que bien fácil ye, enantes d’enseñar la oreya, negando la propia existencia de la lliteratura asturiana, molestase en comprobalo... Abastarávos consultar les cuasi mil páxines de la monumental "Historia de la lliteratura asturiana", editada pola Academia de la Llingua baxo la dirección de Ramos Corrada. O mirái, siquiera, les doscientes de la “Lliteratura asturiana nel tiempu” d'Antón García... Obres estes a les que tou asturianu habría echar necesariamente una güeyada pa esterrar d'una vez una falsedá que non por dicila munches veces (y delles, de forma interesada) dexa de ser mentira.

Abúltenme afayadices equí estes palabres de Víctor Balaguer, diches nel so discursu d'ingresu a la RAE de 1883: «Aquellos yerran que al escribir la historia de las letras españolas reducen todas sus glorias á la literatura castellana. Eximia es ésta […]; pero mayor ha de ser el timbre y más de envidiar el lauro, si ya con cinco literaturas, que no con una sola, puede nuestra nación presentarse á contender en el palenque ó concurso de las naciones literarias. Las provincias catalanas, con Valencia y las Baleares, tienen una literatura. La tienen los euskaros, los gallegos y los astures. De estas literaturas, llamémoslas regionales, no se dice tal vez todo lo que se debiera por lo mucho que ellas valen y merecen. Es, quizá, que son poco conocidas, y, por lo mismo, poco estudiadas». A más d’ún-y convenía tomar nota d’esto…

El problema tresciende, al mio mou de ver, lo meramente cultural. Ye un niciu notable de pa ú empobina Asturies… Y ye que los pueblos que nun rinden homenaxe a los sos poetes, difícilmente s'aprecien a ellos mesmos...




Versión encurtiada al asoleyar en LVT por mor del espaciu disponible:



Tien l'asturianu una lliteratura bayurosa, con continuidá notable desde Antón de Marirreguera (s. XVII) hasta'l Surdimientu actual. Pero, inxusta y estrañamente, solo unos pocos poetes y prosistes tuvieron el privilexu de trescender al conocimientu popular, munches veces por mor d’una versión musicada de dalguna de les sos composiciones (y bastantes d’estes veces ensin que se sepa bien quién ye l’autor). Ye’l casu, por exemplu, de Tiadoro Cuesta, poeta idolatráu na so época, al que debemos la célebre "Cosadiella" que Jerónimo Granda inmortalizó nel so trabayu "Terrentempléte, morrióte un xatu", y qu'a toos vos sonará: «¿Qué cosa cosadiella ye una cosa, / (y non ye cosadiella revesosa) / que s'encueye, s'espurre o s'enduviella / y estadoñu paez, blima o cibiella...?». Casos asemeyaos son, por exemplu, Marcos del Torniellu, col so “Soi de Verdiciu”; Delestal, col so “La mina de la Camocha”, etc. Nel Surdimientu actual, tuvo cierta fortuna popular Xuan Bello. Y, por desgracia, poco más se conoz…

Pero resulta que la nómina de los nuestros poetes y prosistes ye, realmente, munchísimo más llarga, y continuada, como dixi, nel tiempu, a lo llargo de cuatrocientos años… Y bono, con esti puntu de partida, con esta traxectoria centenaria, nun dexa d’ablucar dafechu’l desconocimientu qu’ente la xente común se tien d'esta lliteratura, a lo qu’hubo contribuyir notablemente la falta d’estudiu nos planes reglaos de les escueles, pero tamién otros factores. Cierto ye que nun ye dalgo que nun se dea n'otros munchos llugares. El desconocimientu llega, de fechu, dacuando, a los mesmos dirixentes del mundu de la  cultura. Pero ello ye que, amás, nesta tierra, llega la situación a un puntu estremu. Porque yá nun ye'l fechu de que se desconozan, en xeneral, les grandes figures y monumentos de la propia lliteratura. Equí, arriendes, bona parte de la población, cree a cencielles que, rasu por corriente, nun existe una lliteratura asturiana. En discusiones comunes siéntese espetar dacuando, cuando d’ello se fala, que l'asturianu... ¡nun tien lliteratura! Pero, lo que ye entá más grave, fataes como esta tienen llugar tamién n'entornos que podríemos considerar 'cultos'. Nel mundu filolóxicu peninsular esterior a Asturies, por exemplu, y refiérome al mundu académicu, la lliteratura asturiana ye ciertamente una gran desconocida, y nun falta quien, mesmamente ente profesores d'universidá, s'amesta al grupu de los que la dan por inexistente... o, a lo sumo, aceuten que se resume nunes poques obres costumistes... prescindiendo inclusive de la lliteratura asturiana actual,  que ye, ensin dulda, d'un nivel equiparable  al de cualquier otra lliteratura del mundu, y qu'habría ser oxetu necesariu d'estudiu pa cualquier investigador de la lliteratura peninsular.

Y la cuestión ye que bien fácil ye, enantes d’enseñar la oreya, negando la propia existencia de la lliteratura asturiana, molestase en comprobalo... Abastarávos consultar les cuasi mil páxines de la monumental "Historia de la lliteratura asturiana", editada pola Academia de la Llingua baxo la dirección de Ramos Corrada. O mirái, siquiera, les doscientes de la “Lliteratura asturiana nel tiempu” d'Antón García... Obres estes a les que tou asturianu habría echar necesariamente una güeyada pa esterrar d'una vez una falsedá que non por dicila munches veces (y delles, de forma interesada) dexa de ser mentira.

Abúltenme afayadices equí estes palabres de Víctor Balaguer, diches nel so discursu d'ingresu a la RAE de 1883: «Aquellos yerran que al escribir la historia de las letras españolas reducen todas sus glorias á la literatura castellana. Eximia es ésta […]; pero mayor ha de ser el timbre y más de envidiar el lauro, si ya con cinco literaturas, que no con una sola, puede nuestra nación presentarse á contender en el palenque ó concurso de las naciones literarias. Las provincias catalanas, con Valencia y las Baleares, tienen una literatura. La tienen los euskaros, los gallegos y los astures. De estas literaturas, llamémoslas regionales, no se dice tal vez todo lo que se debiera por lo mucho que ellas valen y merecen. Es, quizá, que son poco conocidas, y, por lo mismo, poco estudiadas». A más d’ún-y convenía tomar nota d’esto…


El problema tresciende, al mio mou de ver, lo meramente cultural. Ye un niciu notable de pa ú empobina Asturies… Y ye que los pueblos que nun rinden homenaxe a los sos poetes, difícilmente s'aprecien a ellos mesmos...