martes, 16 de febreiro de 2016

Estramps (Jordi de Sant Jordi)


VERSOS LLIBRES (ESTRAMPS)


So la frente'l fustax llevo de vueso,
de que'l mio cuerpu fuelga nueche y día,
qu'observando la mui guapa figura
quedóme de la faz vuesa calquier
y la muerte nun ha xebrar la forma;
qu'en tando afuera ensembre d'esti sieglu
los que lleven el cuerpu mio al sepulcru
sobre la faz han veme'l vuesu signu.

Como neñu que mira pal retablu
y al ver él la pintura y les imáxenes
con llimpiu corazón, nun son xebralu
-pues tanto-y presta l'oru que lu endolca-;
socédeme énte'l círculu amorosu
del vuesu cuerpu, orniáu de tantos bienes,
qu'al velu más qu'a Dios yo lu contemplo;
¡talu'l gociu d'amor que me calistra!

Na mio cárcel me tien presu y atáu
amor ardiente, igual qu'en dientro un cofre
piesllu so llave, y nél mio cuerpu ensembre,
sin que sía a movelu dal alcuentru.
Tan grande amor yo siento, ya tan firme,
que nun me xebro un puntu por angustia,
formosa, que toi fitu como torre
n'amavos solo a vós, blanca palomba.

Guapa ensin par de tan noble presencia,
vuesu cuerpu Dios fixo sobre toes:
guapu, allegre, lluz más que fina piedra,
guapu, amante, calistra más qu'estrella;
d'u, viéndovos en báramu con otres,
xúlgoles menos, mesmo que'l carbunclu
que de virtú les fines piedres pasa:
como'l ferre pal mierlu yes pa elles.

El mio amor, que m'estiella toles partes,
nunca esistió en cuerpu o n'alma d'home,
¿cuándo amó más cordial home nengún
con esti amor que m'abre'l corazón?
Más turbáu toi que non tevo Aristóteles
d'amor que m'arde y mios sentíos suelta,
como'l monxu que nun sal de so celda
de vós, como deu d'uña, nun me xebro.

¡Oh cuerpu honráu, sin fraude nin delitu!
Tenéi piedá de min, guapa muyer,
y nun dexéis qu'amándovos pereza,
qu'ámovos más qu'afirma nengún home;
y suplícovos, árbol el más guapu
de tou frutu u valor grande s'asombra,
que me prindéis nel vuesu cuartu escelsu,
pues vuesu soi y he selo cuanto viva.

Mio ricu balax: vós lleváis el timbre
nel rexistru del mundu, sobre toes,
que tou día naz cuerpu en vós, y alica,
más qu'en Pentasilea bondá y puxu.