mércores, 16 de marzo de 2016

La despidida (Jordi de Sant Jordi)


La despidida


Por vós sospiro, dama, yo de lloñe,
y sospirando crez la mio llocura
del vuesu amor, que máncame tan fuerte
que torna'l gociu en gran melanconía
si de la vuesa ausencia yo m'alcuerdo,
y ello failo la vuesa guapa vista
y l'adiós qu'habré yo de la que parta,
que m'asalta tristura y me conquista.

Bien sé que me valiera más morrer,
como fixo San Pedru o Xuan Bautista,
de cruel muerte, qu'en puntu talu tar
de ceremonia tala ver, tan triste,
que de pensalo xuiciu y saber pierdo
y como llocu falo nel mio alloriu
pa comigo, y si alguién me pide xuiciu
yo respuéndo-y razón desmesurada.

Pues finu amor estrínxeme tan fuerte,
nun quiero pa partir en tal apiertu
poné'l güeyu, pues xuiciu nun valiera,
arte o saber; mas pues ye mio ventura
que forciáu alloñame heba de vós,
despídome darréu y yá pa siempre
del vuesu cuerpu, guapu y ensin par,
y dexo'l mio corazu en vuesa estancia.

¿Cómo he poder llibrar, ¡Dios!, de la muerte
desque me vea solu y ablucáu,
nun barcu de madera allá na mar,
de vós ausente, lloñe d'estes tierres?
Recordando que toi tan alloñáu
del país dolce u'l vuesu cuerpu muera,
entós morriera, ansí desesperáu,
maldiciendo fortuna y mala suerte.

Comiendo a Dios les vueses formosures;
y el fustaxe qu'aventa tolos males.
Comiéndovos a Dios, que'l mundu honráis,
qu'en mediu'l corazón lleváis Honor.
Comiendo a Dios d'amor vuesa mirada
con que primís mio cor d'u se divisa.
A Dios vos doi, agora, pues me xebro
de la meyor que nunca usó camisa.

Per dayures yo soi, reina d'honor,
vivu o muertu, de tou xeitu, de vueso;
y ruego a Dios del mal que nun me guarde
si me xebro d'amor que tó en corazu.