mércores, 9 de marzo de 2016

Un poema


La tresformación


Soi otru ser...
El to obleru agudu inyeutóme en cuerpu
la dosis que convenía, la midida xusta,
del velenu...

Foi rápida la tresformación,
y foi xabaz, espantible, ensin vuelta atrás:
les célules mutanon inevitablemente,
invadienon, atacanon ensin piedá
les fortaleces del mio organismu...
Cayenon adulces los bastiones
y la ruina afaró dafechu
la esencia del mio esistir...

El sangre fervía entós como cazuela en fornu.
Inflamaes les venes, retorcíense como guxanos
de fueu ingriento. La carne esgarrábase,
esñizábase, fendía...

Y per cada poru, al fin, del cuerpu, l'alma fuxía
como fumu per chimenea...

Y dexé de ser home, y más nunca nun lo fui...