venres, 15 de xullo de 2016

Decamerón III,10 (Boccaccio)


[III,10] Alibech faise ermitaña, y el monxu Rustico adepriénde-y a meter el diañu n’Infiernu; dempués, sacada d’ellí, conviértese en muyer de Neerbale.



Dioneo, qu’escuchare dilixentemente la novela la reina, sintiendo que finare y que solo a él-y faltaba falar, ensin esperar el mandatu, sorriendo, entamó dicir:

—Gracioses señores, vós nun sentiestis seique cuntar enxamás cómo se mete al diañu n’Infiernu; y por ello, ensin xebrame cuasi del argumentu sobre’l que vós razonestis tou esti día, vo cuntávoslo yo: quiciabes podáis, arriendes, ganar l’alma adeprendiéndolo, y conocer, amás, que, magar qu’Amor habite nos gayoleros palacios y nes mórbides cámares de más bon aquel que nes probes cabañes, non por ello dexa dalguna vez de dexar sentir les sos fuercies ente les mestes viesques y los ríxidos alpes y nes ermes cueves: polo que pue pescanciase que toles coses tán suxetes al so poder.

»Viniendo, darréu, al asuntu, digo que na ciudá de Cafsa, en Barbería, hebo yá tiempu un home perricu, qu’ente otros fíos sos tenía una fiína formosa y donosa, que llamábase Alibech. Y esta, nun siendo cristiana, y sintiendo a munchos cristianos qu’había na ciudá aponderar muncho la cristiana fe y el serviciu de Dios, un día, entrugó-y a ún d’ellos de qué manera y con menos enzancu podía sirvise a Dios. Y esti respondió-y que sirvíen meyor a Dios los que más fuxíen de les coses del mundu, como faíen aquellos que marcharen a la solitú de los ermos de Tebaida. La moza, que yera mui simplaya y d’unos catorce años d’edá, non por deséu ordenáu sinón por un petite pueril, ensin nada dicir a naide, la mañana viniente empobinó sola dafechu, de secultres, pal ermu de Tebaida; y con gran fatiga d’ella, continuando col so petite, dempués de dellos díes, aportó a aquelles solitúes, y viendo de lloñe una casina, foi a la so escontra, y atopó ellí un santu home al par de la puerta, y esti, maraviándose de vela ellí, entrugó-y qué andaba buscando. Y ella respondió-y que, inspirada por Dios, andaba buscando ponese al so serviciu y tamién quién-y deprendiere cómo convenía sirvi-y. El bon home, viéndola nueva y mui formosa, temiendo que’l demoniu, si él la retenía, lu engañare, emponderó-y la so bona disposición; y dándo-y de comer raigaños de yerbes y frutes villanes y dátiles y de beber agua, díxo-y: «Mio fía, non mui lloñe d’equí hai un santu home, que de lo que tu vas buscando ye muncho meyor maestru de lo que yo so; vas dir a él»; y púnxola en camín. Y llegando ella a él y teniendo con él estes mesmes pallabres, diendo más alantre, aportó a la celda d’un ermitañu mozu, mui devota persona, y bona, que tenía por nome Rustico, y fíxo-y la demanda qu’a los otros-yos fixere. Y esti, por querer faer de la so firmeza una gran prueba, nun la mandó marchar o siguir alantre como los otros sinón que retúvola consigo na so celda; y llegada la nueche, fíxo-y un xergón de rama de palma nun sitiu y díxo-y que descansare sobre él. Fecho esto, nun s’allancianon muncho les tentaciones en dar batalla a les fuercies d’él; y esti, alcontrándose engañáu, en muncho, no que faía a aquelles, ensin munchos asaltos, volvió’l llombu y diose por vencíu; y, dexando a un llau los pensamientos santos y les oraciones y les disciplines, entamó trayer a la memoria la xuventú y la formosura d’aquella, y, arriendes d’ello, a pensar qué vía y qué mou debía tener con ella col envís de que nun se decatare de qu’él, como home disolutu, quería llegar a aquello que d’ella deseaba. Y tantiguando de mano con delles entrugues, supo qu’ella nun conociere home enxamás y que yera tan simplaya como abultaba; polo que pensó cómo, so especie de sirvir a Dios, pudiere trayela a los sos placeres. Y primeramente amosó-y con munches pallabres cuánto’l diañu yera enemigu del Señor Dios, y dempués dio-y a entender que’l serviciu que más gratu podía faese a Dios yera meter el diañu n’Infiernu, al que’l Señor Dios lu condergare. La mocina entrugó-y cómo se faía aquello; y Rustico díxo-y: «Vas sabelo llueu, y pa ello fadrás lo que me veas faer»; y entamando esnudase de los pocos vistimientos que tenía quedó en porriques dafechu, y lo mesmo fixo la mocina; y púnxose de rodíes a xeitu de quien quier rezar y fíxola ponese contra él. Y tando asina, amburiáu Rustico más que nunca nel so deséu al vela tan formosa, vieno la resurreición de la carne; y contemplándola Alibech y maraviándose, dixo: «Á Rustico, ¿qué ye eso que te veo que te sal asina p’afuera, y yo nun lo teo?» «Oh mio fía,» dixo Rustico «ello ye’l diañu del que te falé; y has ver qu’él agora cáusame grandísima molestia, tanta que yo malpenes so sufrila.»

»Entós dixo la moza: «Oh, lloáu seya Dios, que veo que to meyor de lo que tu tas, que yo nun teo esi diañu.» Dixo Rustico: «Dices verdá, mas tienes otra cosa que yo nun teo, y tiénesla en llugar d’esto.» Dixo Alibech: «¿Y qué ye, ho?» Y Rustico díxo-y: «Tienes l’infiernu; y dígote que cuido que Dios mandóte equí pola salú de la mio alma, porque si esti diañu va causame esti dolor, si tu quies tener de min tanta piedá y sufrir que yo lu meta n’infiernu, vas dame grandísimu consuelu y a Dios vas dar grandísimu placer y serviciu, si pa faer ello viniesti a esti llugar, según tu dices.»

»La moza, de bona fe, respondió: «Oh, mio padre, darréu que teo l’infiernu, seya ello cuando vos preste.» Dixo entós Rustico: «Mio fía, ¡bendita seyas! Vamos, darréu, y vamos metelu de mou que me dexe tranquilu.» Y dicho esto, amenada la moza sobre ún de los sos xergones, adeprendió-y cómo debía ponese col envís d’encarcelar a aquel malditu de Dios.

»La moza, que nunca nun metiere n’infiernu diañu nengún, sintió la primer vez un poco de dolor, polo qu’ella díxo-y a Rustico: «De xuru, mio padre, mala cosa debe ser esti diañu, y ciertamente enemigu de Dios, que mesmamente n’infiernu, non yá n’otra parte, duel cuando se mete dientro.» Dixo Rustico: «Fía, ello nun ha asoceder siempre asina.»

»Y pa faer qu’esto nun asocediere, seis vegaes, enantes que del xergón se movieren, lu metienon ellí, tanto que, per aquella vez, quitánon-y tan bien la soberbia de la cabeza, que quedó en paz de bon aquel. Mas volviéndolu dempués, nel tiempu que siguió, munches veces, y dispuesta la moza, obediente siempre, a quitá-yla, asocedió que’l xuegu entamó presta-y y empecipió dici-y a Rustico: «Bien veo qu’aquellos bonos homes de Cafsa dicíen la verdá, que’l sirvir a Dios yera cosa tan dolce; y, de xuru, nun recuerdo que fixere nunca otra cosa que me diere tantu deleite y prestu cuanto ye’l meter el diañu n’infiernu; y, poro, camiento que cualquier persona que s’ocupe n’otro qu’en sirvir a Dios ye una bestia»; y por mor d’ello diba ella munches vegaes a Rustico y dicía-y: «Mio padre, yo vini equí pa sirvir a Dios y non pa tar folgada; vamos meter el diañu n’infiernu.» Y, en fayéndolo, dicía ella dalguna vez: «Á Rustico, yo nun sé por qué’l diañu s’escapa del infiernu; que, si él tuviere ellí de tan bon aquel como l’infiernu lu recibe y lu tien, nun saliere enxamás.»

»Asina, darréu, convidando davezu la moza a Rustico y confortándolu al serviciu de Dios, tanto-y quitare la llana del xugón, qu’él sentía fríu nes ocasiones nes qu’otru sudare; y, poro, entamó dicir a la moza qu’al diañu nun había que castigalu nin metelu n’infiernu nun siendo cuando elli, por soberbia, llevantare la tiesta: «Y nós, pola gracia de Dios, tanto lu desganemos, qu’él ruega a Dios quedar en paz»; y asina, impunxo dalgo de silenciu a la moza. Quien, dempués que vio que Rustico nun la requería más pa meter el diañu n’infiernu, díxo-y un día: «Á Rustico, si’l to diañu ta castigáu y más nun te cafia, a min el mio infiernu nun me dexa en paz; polo que fadrás bien si tu col to diañu axudes a amatar la rabia al mio infiernu como yo col mio infiernu axudé a quitar la soberbia al to diañu.»

»Rustico, que de raigaños de yerba y d’agua vivía, mal podía responder a les puñaes; y díxo-y qu’abondos diaños quixeren poder amatar l’infiernu, mas qu’él fadría lo que por ella pudiere. Y asina, satisfaíala dalguna vez, mas yera tan de ralu en ralu, qu’otro nun yera qu’aventar una faba na boca al lleón; polo que la moza, nun-y paeciendo sirvir a Dios tanto cuanto quería, roñaba de contino. Pero mientres qu’ente’l diañu de Rustico y l’infiernu d’Alibech había, pol munchu deséu y pol menor poder, esta cuestión, asocedió que prendió un fueu en Cafsa, nel que, na propia casa, ardió’l padre d’Alibech con cuantos fíos y demás familia tenía; y, por mor d’ello, Alibech quedó heriede de tolos sos bienes. Polo qu’un mozu llamáu Neerbale, que gastare en pompes tolos sos haberes, oyendo qu’ella taba viva, púnxose a buscala y atopóla enantes que la xusticia s’apropiare de los bienes que foren del padre, como d’home muertu ensin heriedes, y con gran prestu de Rustico y contra la voluntá d’ella, llevóla a Cafsa y tomóla por muyer y, con ella en xunto, fíxose heriede del gran patrimoniu d’ella. Mas entrugándo-y a ella les muyeres en qué sirvía a Dios nel ermu, nun se folgando entá Neerbale con ella, respondió-yos que lu sirvía metiendo’l diañu n’Infiernu y que Neerbale cometiere gran pecáu xebrándola d’aquel serviciu.

»Les muyeres entrugánon-y cómo se mete al diañu n’Infierno. Y la moza amosó-yoslo con pallabres y con xestos; de lo que tanto rienon qu’inda tán riendo, y dixénon-y: «Nun t’atristayes, né, non, qu’ello faise bien tamién equí; Neerbale va sirvir bien contigo al Señor Dios neso.»

»Dempués, diciéndo-ylo una a la otra per tola ciudá, reduxénonlu a un dichu vulgar: que’l más prestosu serviciu que pue faese a Dios ye meter el diañu n’infiernu; y esti dichu, pasáu a esti llau del mar, inda se conoz. Y por ello vós, señores moces, a quien la gracia de Dios ye necesaria, deprendéi a meter el diañu n’infiernu, darréu qu’ello ye mui grato a Dios y prestosu pa les partes, y pue d’ello aniciase y siguise muncho bien.